Ibinahagi naman ni Dr. Perez ang kanyang saloobin sa pagkakaroon ng isang aklat pambata na tampok ang kanyang buhay. “Kung may isang salitang makakapaglarawan sa karanasang ito, iyon ay nakakapagpapakumbaba. Nagulat ako na may ganitong uri ng proyekto. Nang mabasa ko ang aklat, ay yun din ang unang pagkakataong nakita ko ang sarili kong kwento. Kakaiba ang pakiramdam dahil kapag ako ay nagkwekwento ng aking buhay, piling bahagi lamang ang naibabahagi ko. Ngunit sa kwentong sinulat ni Eugene- mula sa aking kabataan sa Naga, hanggang sa NASA at sa PhilSA, ay nagbigay ito sa akin ng mas malalim na pagpapahalaga sa aking pinagdaanan. Nakita ko ang aking kwento mula sa ibang pananaw,” aniya.

Ibinahagi rin ni Dr. Perez na tulad ng maraming kabataan, itinuring niya noon ang sarili bilang isang ordinaryong tao. Hindi niya pinangarap maging siyentista sapagkat wala naman siyang kilalang siyentista noong siya ay bata pa. “Ang mensaheng nais kong ipaabot sa mga batang babasa ng aking kwento, ay kaya rin nilang makamit ito—at higit pa. Dumating ang mga oportunidad sa aking buhay, at naging handa akong yakapin ang mga ito at harapin ang mga hamon. Dahil doon, narating ko kung nasaan ako ngayon,” dagdag niya.

Binigyang-diin din ni Dr. Perez na ang maagang pagkakaroon ng mga role models ay maaaring magbukas ng mas maraming oportunidad para sa mga batang babae na pumasok sa larangan ng Agham, Teknolohiya, Inhinyeriya, at Matematika (STEM). Habang lumalaki, ang mga babaeng siyentistang nakikita niya ay kadalasan lamang sa mga pelikula, at madalas pang inilalarawan bilang mga “baliw na siyentista” na magulo ang buhok. “Noong bata pa ako, sana ay mas marami akong naging role models—napakahalaga niyon. Nagpapasalamat ako na nang dumating ang panahon ng pagpapasya tungkol sa aking karera, ay nabigyan ako ng pagkakataong makatrabaho ang mga taong maaari kong tularan, at sila ang naging inspirasyon ko upang tahakin ang agham,” paggunita niya.

Ayon naman kay Dr. Giovanni Tapang, dating Dekano ng UPD-CS, kaibigan at dating kasamahan  ni Dr. Perez sa National Institute of Physics (NIP), ipinakikita ng Isang Puwang sa Kalawakan kung gaano kahalaga ang agham at teknolohiya sa paghubog ng kinabukasan ng bansa. Binigyang-diin niya ang kahalagahan ng ambag ni Dr. Perez sa larangan ng agham pangkalawakan. Dagdag pa niya, ang aklat ay hindi lamang pagdiriwang ng mga tagumpay ni Dr. Perez kundi pagkilala rin na may lugar ang kababaihan sa larangan ng space science at STEM. “May kakayahan tayong angkinin ang maliit na puwang na iyon, palawakin ito, at ilantad para sa kapakinabangan ng Pilipinas,” pagtatapos ni Dr. Tapang.

Nabuo ang serye ng mga aklat pambatang Sulong Agham sa pamamagitan ng pagtutulungan ng Kolehiyo ng Agham at Kolehiyo ng Arte at Literatura ng UP Diliman, at ng non-profit na organisasyong Supling Sining, Inc.

Kabilang din sa iba pang aklat sa seryeng ito ang Ang Doktor ng Dagat, na tampok ang marine scientist na si Deo Florence Onda na isinulat ni Prof. Rosario Torres-Yu; at Ang Natatanging Ngaratngat, na tampok ang biologist na si Leonard Co na isinulat naman ni Prof. Mon Sy.